ТРИ ЕЛЕМЕНТИ ЈАГИ АНТЕНА ЗА 868 MHz (Helium Mining)

I Z33T home page I страници на македонски јазик I

- Евтина, лесна, мала, 3 елементна Yagi антена која лесно може да се изработи, со што ќе се добие поголем сигнал во саканата област на покривање на LoRaWAN хотспотот, многу повеќе witness и rewards во однос на оригиналните фабрички антени кои одат со хотспотот.

- Одлични перформанси, чист главен сноп на зрачење - особено погодна за места од каде треба де се покрие област под широк агол од речиси 180 степени

- Засилување = 7.11 dBi, односно 5 dB во однос на дипол (dBd)

- Антената има одличен SWR во целото LoRaWAN фреквенциско подрачје (868 MHz), така што предавателот на хотспотот ќе може лесно да ја испорача целата своја РФ-моќ во антената, а преку неа во просторот.

- Идеална антена за почетници, зашто антената е проверена во пракса и дава одлични перформанси, а мали грешки во димензиите при изработката нема да имаат големо влијание на крајниот резултат.

- Напојувањето е со коаксијален кабел 50 оми приклучен директно на диполот од антената. Пожелно е да се направи 1:1 балун веднаш до точката на напојување, но не мора. Балунот служи за симетрирање на несиметричниот коаксијален кабел кон симетричната точка за напојување на антената, без трансформација на импедансата. Името BALUN доаѓа од англискиот израз BALanced-UNbalanced.

- Должината на антената изнесува само 10 cm од рефлекторот (R) до последниот директор (D3), а носачот може да биде подолг (на пример 30 cm) за да може да се прицврсти на некоја метална цевка.

- Сите елементи се изработени од месингени електроди за заварување со дијаметар од 2.5 mm. Наместо месингени електроди, може да се употреби бакарна жица (од ПВЦ кабел за струја 6 мм2, односно дијаметар од 2.6 mm, откако ќе се симне ПВЦ изолацијата)

- Носачот на антената (Boom) е направен од пластична цевка за водоводни инсталации со дијаметар од 20 mm.

За носач на една од неколкуте антени што ги направив, употребив носач од бакелит, така што од бакелитна табла (што се употребува за електрични осигурувачи) исеков со убодна пила еден облик кој ми послужи како носач на елементите на антената и носач на металните шелни за прицврстување на вертикална цевка. Оваа иработена антена може да се види на фотографиите на крајот од овој напис.

- Носачот на антената (Boom) може да биде и метален, на пример алуминиумска цевка или алуминиумски профил 15х15 mm, но тогаш елементите треба да бидат монтирани на пластичен отстојник, на растојание од минимум 5 mm од металниот носач.

Дефинирање на елементите на антената во 4nec2 софтверот за моделирање и оптимизација на антени:

SWR и ширина на фреквенцискиот опсег:

Засилување на антената (во dBi) и однос напред/назад (Front/Back):

Хоризонтален и вертикален дијаграм на зрачење:

3Д графички приказ на зрачењето на антената:

Дијаграм на зрачење на антената кога е насочена кон набљудувачот:

Дијаграм на зрачење (во вертикална рамнина) на една вертикално поставена три елементна Јаги антена (поглед од страна):

Дијаграм на зрачење (во вертикална рамнина) на систем од две фазирани вертикално поставени три елементни Јаги антени, монтирани една над друга на растојание од 345 mm (поглед од страна):

Дијаграм на зрачење (во хоризонтална рамнина) на систем од две фазирани вертикално поставени три елементни Јаги антени, монтирани една над друга на растојание од 345 mm (поглед одозгоре):

Во продолжение се фотографии од изработката на една од неколкуте антени од овој вид што ги направив. Носачот на оваа антена го исеков од една бакелитна табла со дебелина од 5 mm. Бакелитна табла може да се набави во продавница за електрични делови и железарија. Се употребува за изработка на табла за електрични осигурувачи. Поради своите изолаторски карактеристики и цврстина, може да послужи како одличен носач за помали Јаги антени. Најнапред на еден лист хартија го нацртав обликот на носачот, а потоа го исеков со убодна пила. Користев пила за сечење на метал бидејќи бакелитот е многу цврст материјал.

Елементите ги прицврстив со пластечни затеги, а потоа ги фиксирав со двокомпонентно епоксидно лепило (Poxipol):

Измерените карактеристики на направената антена покажуваат дека параметрите на антената се речиси идентични со проектираните во софтверот за моделирање и оптимизација на антени:

(кликнете на горнава слика за да ја видете во повисока резолуција)

(кликнете на горнава слика за да ја видете во повисока резолуција)

- - - - - - - - - - - - - - - - - - - - - - -

Еве уште една иста антена, ама правена неколку месеци подоцна, во февруари 2023 година:

На фотографијата се гледа коаксијалното кабелче за диполот, двата елементи на диполот изработени од месингена електрода (2.5mm) со должина од по 81 mm, како и мала пластична кутиичка во која ќе се направи спојот на коаксијалното кабелче со елементите на диполот и ќе се залие со двокомпонентно епоксидно лепило:

На едниот крај на коаксијалниот кабел има ставено женски N-конектор а другиот крај се подготвува за да се залемат двете половини од диполот:

Елементите на диполот се залемени на коксијалниот кабел:

На малата пластична кутиичка се направат исечоци на соодветни места за да се сместат кабелот и елементите како на сликата подолу:

Потоа кутиичката се исполнува со двокомпонентен епоксиден лепак (јас користев Poksipol-transparent), за да се заштити од навлегување на влага:

Антената е готова и може да се приклучи на Векторски анализатор на РФ-мрежи за да се измерат карактеристиките:

Измерените вредности се одлични - точно такви какви што треба да бидат:

Елементите од месинг се прицврстени на бакелитниот носач со пластични стеги, а потоа местата на споевите се залиени со двокомпонентно епоксидно лепило:

Антената е монтирана и приклучена кон хотспотот со параче коаксијален кабел LMR-400:

- - - - - - - - - - - - - - - - - - - - - -

Миле Кокотов (2022 година, дополнето во февруари 2023 година)

Авторот е магистер по технички науки, со искуство од речиси 40 години во РФ-техниката (професионално и аматерски)

Разгледајте ги и другите написи и проекти на неговата веб-страница

I Z33T home page I страници на македонски јазик I