煙雨淒迷火炭夜

XO醬有感而發

是夜不單煙雨凄迷，竟既冷且凍，一個連老鼠都不敢出洞的晚上，卻在飯堂聚集了十九幾人飲食吹水。上校一時興起，搞了一煲偷香洩慾之肉骨茶，一眾人等不斷研究其美味之處，更有人吹噓此味乃男人恩物，真係唔知信唔信好。飲過覺得有效者，請電郵本人為要。

話說班友飲飽食醉，已經凌晨，本來大家諗住返歸早D入被竇，甚至可以發揮下傳說中肉骨茶的神秘力量，點知竟有人提議去參觀及鑑賞一套價值百九幾萬港元之 HiFi（冇作大，真係一百九十幾萬）於是乎又浩浩蕩蕩向火炭操去。（所以話呢，如果你份人好客，屋企夠大，董事長唔咋形，鄰居又明白事理冇投訴的話，呢班人真係識得過！）

話說大隊出發之時，有條叫做XO仔之正契弟晌屋企等緊肉骨茶藥力發作，無聊之餘，梗係同大隊在空氣保持接觸喇，同一頻道上仲有一個在溫暖的家聚緊天倫之Q仔，傾下傾下，大隊中冇牙老虎竟然聲稱如果呢個時候踩車落火炭，佢就請食雞粥，以本傷人，本來一直係XO仔慣技，佢當然唔會為些少便宜而博命喇，但又冇理由俾一個全Ham界都睇死之人睇死丫；望出窗外，霧雨依然，兼且寒意逼人，就在此時，Q仔溫暖親切的聲音響起：係唔係行？我陪你！

既是高手相陪，幾大就幾大，立即出車。

十五分鐘後，吐露港單車徑就多左兩名在寒風冷雨中奔馳既傻，幸得成晚冇遇倒差人巡邏截查，否則必不能作令人入信之解釋而帶署問話。

沿途艱苦，不用說也可理解喇；另一方面，老虎聽倒機話二人已出車，喜不自禁，諗住呢舖XO仔唔凍僵都淋病喇，如果肺炎就更可賀，魂斷凄涼潭一仇，今晚得報咯！

未幾，搞完 FiHi，落到大排檔，卻見Q仔XO仔二人好瀟洒怡人又精神咁等緊大隊，老虎失望之餘，對比起自己從來未有此膽量毅力，不禁既妒又恨，無形中又輸一仗俾呢隻老鬼，老羞成怒，竟反口話冇講過請食粥，但XO仔覺得睇倒老虎自愧個樣都值回票價，當然不與其爭論喇。哈，佢仲垂死掙扎，埋單時佢同Q仔俾埋錢都唔請XO仔，咁幼稚之行徑即係向全世界人表示幾咁仇視O仔。睇來凄涼潭一役，其受創之深，實難估計。

雖然係咁，O仔依然好体貼咁，雖則咁多車返大埔，佢依然堅持踩返大埔，用咁方式去滿足老虎。

在此需要重點讚揚下Q仔，本來超人話車埋佢返屋企，但佢見倒 XO 仔一個人踏上歸途，竟然尾隨相伴，當時為凌晨二時十分，氣溫十一度；有戰友如此，夫復何求？一個咁高尚情操的人，又會唔會令老虎更形自卑呢？

所以全晚主角，根本就係Q仔，無辜受累，仍表現出英雄氣慨，好野。