單車仔環北第四波動畫

是日也，都唔知咩野天氣，晨早流流，未夠六點，天都未光齊，電話就響起：「XO仔，起身尿尿哪，然後睇我地踩車！」還未回魂搞清佢係乜誰，已經彈起，今日係江湖綽號：北區孟嘗萬能勇士實牙實齒百曉生o既2kg逼車壇叔父撥火酒店出山隻揪之日，咁墟陷之戰約，凡五百年只出現一次，上次就係西門吹雪對葉孤城，結果葉孤城皇帝夢醒，仲喪身西門吹雪劍下，飲恨紫禁之巔！

話說呢條發緊皇帝夢o既2kg呢排怎住摟呢個果個隻揪，到人應承佢但要落正通告佢又話唔係，話當遊下車河咁講，總之想贏俾人睇又怕輸俾人知，行藏閃縮，好不辛苦。

星期六，講好禮拜環北行，加插一場2kg對撥火酒店，但酒店要先讓五分鐘，相約早上六時十五分由粉嶺菜站出發，終點烏蛟騰斜路頂。誰不知……

酒店要接埋記者XO仔，而呢條XO仔搞下化妝襯下衫落得樓都經已六時十五分，菜站果邊廂竟然唔等參賽者酒店經已出發，保守估計由大埔飛身上粉嶺要踩十五分鐘，咁原先話讓五分鐘，而家酒店將車交廠長載住個記者，會同孖八同阿Q，無形中讓左廿分鐘有多！

話說採訪車俾幾個交通燈塞得兩塞，已經唔見酒店孖八縱影，由大埔墟追到康樂園至見倒佢地，值得講下孖八，竟然可以貼住酒店黎跑，實力驚人呀；到得大窩，會合Q仔，三支箭咁標向聯和墟，採訪車要兜入安樂村，又一次俾三條友賣甩，要追到第一橋至見返，發覺阿Q帶得好前，一到坪軬路口，已經追倒偷步o既2kg與及被脅持o既會計師伉儷及教主，冇幾耐酒店孖八都追到上黎，2kg登時冇癮，惟有貼住酒店黎跑扮晒friend，中途又話要去教主老巢兜一轉，閒話不提，到鹿頸路，酒店2kg孖八不相伯仲遊緊，呢個阿Q唔知點解直行去左沙頭角邊境關卡，結果俾幾把MP5指住，逼佢俾個女警搜身兼抽水，好很慘情！

好哪，大戰來臨，偷雞唔倒之2kg起圍，酒店吊住佢且戰且留，上左唔夠四份一，酒店聽倒一種仲響過鼻鼾o既呼吸聲，酒店追前兩步睇下佢係咪入睡駕駛，唔睇由自可，一望立即嚇一跳，只見對手好似在面上塗左金漆，十足蜀山劍俠傳丁引中邪咁款，唔跑快D就契弟喇，結果酒店將佢越拋越遠，去到斜坡頂贏成條街。
採訪車在山頂將戰況如實報導，到2kg經過採訪車時，瞥見佢面色又金又黑，原因就唔理解喇！

蝦…去到終點呢條平時太中意講野o既實牙實齒百曉生唔停低喎，眾人都好奇怪喇，大隊等埋後來者，向大尾督方向進發，去到漁農處至見返失散左o既2kg，當時佢仍未有乜投訴。

返大埔途中，空中聯絡倒超人佬佬，佢問及賽果如何，XO仔當然樂於相告喇，點知呢個時候2kg就投訴話：記者失職，唔響終點漁農處度報導採訪，實情係佢響果個終點度等左半小時，亞軍都未見。

後來露透瀉因要維護社譽，與大會交涉後證實賽程早經公告參賽者，搞錯終點地點云云，實為該健兒之體育精神有值檢討必要。

後來呢位參賽者又話今日踩爛左個鏈餅，就來踩斷左條鏈都唔知！
哦…如果唔係咁，今日賽果就唔一樣囉。
佢實在真係太大力喇！

至於動畫方面，由於在伺服器估用太多空間了，所以經過一段時間後我們現在只保留最精彩及最有價值之第七輯動畫而把其他的移除了。各位股東如有需要，本站可提供光碟版給閣下欣賞 !

第一輯硬照	第二輯硬照	第三輯動畫	第四輯動畫
第五輯動畫	第六輯動畫	第七輯動畫	第八輯動畫
第九輯動畫	第十輯動畫	第十一輯動畫	第十二輯動畫
第十三輯動畫	第十四輯動畫	第十五輯動畫	第十六輯動畫
第十七輯動畫	第十八輯動畫